عطر الصندل/ أحمد شاويش
ست العينين.. عطر الصندل
لو شفتها يوم... عمرك يِطّول..
يمتدّ سنين...
خطوات فنان... إيقاع موزون
همسات شاعر... دايب في فنون
رقة.. وإحساس.. كيف ليها أخون؟
آية خالق.. كم ليها أصون
من عين الناس
لو شفتها عاد كيف تتصبّر؟؟
لون القمرة.. وفايتا بأكتر..
زهرة ياسمين.. وأنفاس عنبر
زفة روعة.. وربك يستر
من عين الناس
يا نغم فنان حاسي في جواي
يا أحلى كلام اتقال في غناي
يا عيد العيد.. الحاسي براي
يا أجمل طيف شفتو في دنياي
الله يخليك... من عين الناس
حاجة فيك / هاشم صديق
حاجه فيك
تقطع نفس خيل القصائد
تشده اجراس المعابد
توهتني .. تعبتني .. جننتني
جننت حرف الكلام
وبرضو ادتني السلام
حاجه في شرف المداين
وفي غرف كل السفاين
جوه في عمق المناجم والعيون
حاجه زي ما تكون محلق في العواصف
فجأة تهبط في السكون
حاجة زي نقر الاصابع
لما ترتاح للموسيقي
حاجه زي اخبار تناغم من جريدة
حاجه زي وتر المواني
لما يصدح لي سفينة
حاجه فيـك لا بتبتدي
لا بتنتهي
خلتني ارجع للقلم
واتحدى بالحرف الالم
واضحك مع الزمن العريض
وانسف متاريس الطريق
واعرف متين ابقي المطر
وافهم متين اصبح حريق
*من الشعر العربي
غازلتها.. فأدارت وجهها خجلا
فبان غمازها في الخد.. واعتدلا
واجهتها.. فانبرى من قوس مقلتها
سهم فقلت بروحي قاتل قتلا
يا وردة الخلد من انهاره رويت
ماء الجمال.. فطاب الحسن واشتملا
فقلت ما اسمك؟! قالت نادني قمرا
فقلت والله بل بدر قد اكتملا
تبسمت.. فأضاءت من تبسمها
روحي.. وما حولها.. والعالم احتفلا
وحاولت عبثا إخفاء بسمتها
أنامل ما رأت عيني لها مثلا
قالت بصوت اذاب القلب رقته
رحماك يا شاعري.. ذوبتني غزلا
فقلت رحماك أنت يا معللتي
ذاب الفؤاد غراما والجوى اشتعلا
صورتك الخايف عليها/ حسن الزبير
صورتك الخايف عليها.. ونحن ما خايف علينا
هاك بي تذكارا شيلا.. وشيل معاها الفي عينينا
فيها أيه إنسان بعزك لما يحفظ ليك صورة!!
فيها قامتك.. وابتسامتك.. وسحر عينيك الخجولة
فيها راحة.. وفيها واحة.. كل ما يتعب يزورا
فيها ما بيملاها عينو.. وكيف يخلي عيون تطولا!!!
انت لو صادق في ريدك زي صدق ريدتنا ليك
انت زينا لو تساهر لو بطول الليل عليك
كان بفوت فرحك فرحنا.. يوم نشيل شوقنا ونجيك
وكنت ما بتبخل علينا حتى لو نطلب عينيك
أنت صورتك ما أمانة.. كيف نفرط نحن فيها؟!
وقلنا نلجأ لي أمانا من قسى الأيام وتيها
مهما قلت.. وأعتذرت.. غايتو أنت بخلت بيها
وهاك بي تذكارا شيلا صورتك الخايف عليها
الدرداقة/ محمد حسن السيد
و معاكي جميلة الدرداقة
يا أحلى صبية .. و سوّاقة
بس خايفك بكرة تسوقي الريد
على سكة بخيلة و فرّاقة
نفس العينين الشايلاني
تجدعني بعيدآ .. و اتشاقي
و درداقة الليله العاجباكي
باكر تتسمى ( العولاقة ) !
الضل ال هسه دا ضل رايح
راجيانا الشمس .. و رقراقا
بجي يوم و تسميني : " البايخ " !
و انتي في موبايلي : " النقناقة " !
آخ لو في خيار ما نبقي كبار !
بس ويييين ؟ في الدنيا المحّاقة
سوقيني .. " بَحبِّك " .. سوقيني
قبّال ما يصادروا الدرداقة
امي/ عبد الله فزاري ( بابا فزاري )
أُمي يا اجمل كلمة بقولا
يا احلي نشيد يا نغمة جميلة
أُمى جناح من رحمة ونور
أُمى حنان وامل وشعور
امى حنينة بنزورا.. نحن وهي تجينا
بتربينا وبتراعينا وتسعد بينا
تخلى حياتنا تملى جميلة
واحلي نشيد
نقولو نرددو يوم العيد
يوم عيد الام
امي الرحمة دوام قداما
امي الجنة تحت اقداما
امي عظيمة وامي كريمة
حنانا علينا ونور عينينا
تخلي حياتنا تملي جميلة
واحلي نشيد
نقولو نرددو يوم العيد
يوم عيد الام